Pig-aprubaran ni Department of Budget and Management (DBM) Secretary Amenah Pangandaman an pagpapaluwas nin Special Allotment Release Order na nagkakantidad nin P1 bilyon para sa Marawi Siege Victims Compensation sa presenteng taon.
An alokasyon na ini matao nin kompensasyon para sa 574 benepisyaryo, partikularmente sa mga naraot na ari-arian asin mga death claim.
Pinagtawan doon kan kalihim na an importansya kan pagpapaluwas kan pondo komo parte kan padagos na paglalapigot kan gobyerno na maitao an tabang sa mga naapektaran kan kariribukan.
An tabang pinansyal na ini, nakatagama para sa mga biktima kan krisis sa Marawi kan nakalihis na 2017, an obhetong ipadagos an pagtao nin kinakaipuhang suporta para sa rehabilitasyon asin liwat na pagbangon kan syudad.
Sakop kan kompensasyon an mga claim para sa mga dagusan asin mga naraot na istruktura, siring man para sa mga binawian nin buhay kan nakalihis na panahon nin gyera.
