Pigtawanan kan International Criminal Court (ICC) nin hasta sa Hulyo 1 an prosekusyon tangani magpresenta kan ebidensya na gagamiton para sa confirmation hearing sa Setyembre 23, 2025 kan kasong crimes against humanity kontra ki dating Presidente Rodrigo Duterte.
An kasuguan an tinintaan ni ICC pre-trial Chamber 1 Judge Julia Antoanella Motoc, Judge Reine Adélaïde Sophie Alapini-Gansou, asin Judge María del Socorro Flores Liera na sinda man an nagtalaan nin timeline para sa aktibidad para sa confirmation hearing.
Napagaraman na masunad an prosekusyon nin 8,565 dahon kan ebidensya kontra ki Duterte sa atubangan kan ICC.
Sinabi ni ICC Prosecutor Karim Khan na apwera digde, magamit man an prosekusyon kan visual asin audio evidence; 9 na litrato asin haros 16 oras nin video.
Ini an sinaysay ni Khan sa saiyang kasimbagan kan nakalihis na Abril 4 sa mga hukom kan Pre-Trial Chamber mapadapit sa pagsasagibo nin pagdangog para sa kumpirmasyon kan mga kaso. Saro nin redacted na bersyon an isinapubliko kan nakalihis na Abril 15.
Siringpaman, pigtawan duon kan prosecutor na an nabanggit na ebidensya an parte sana kan kabilogang ebidensyang gagamiton sa kumpirmasyon kan mga kaso.
Dugang pa ni Khan, padagos pa man nindang nire-review an saindang mga materyales antes na ireport an dakol kan ebidensya sa korte.
Si Duterte an akusado para sa kasong crimes against humanity na may konkesyon sa saiyang kampanya sa war on drugs kan ini pa an alkalde kan Davao hasta sa magin Prsidente kan Pilipinas.
Sinabi man ni Khan na mawot ninda na magprisinta kan maximum na duwang testigo para sa viva voce asin sa confirmation hearing.
