Pighagad kan sarong piskalya sa South Korea an padusang kagadanan kontra ki dating South Korean President Yoon Suk Yeol katakod kan saiyang deklarasyon kan martial law kan nakalihis na isyembre 2024 na nagdara nin matinding kariribokan sa nasyon.
Marurumdumang nagsiklab an national crisis kan biglang ipautob ni Yoon an martial law asin ipagsugo na bantayan kan mga soldados an parliament na iyong paramientras na nagpautok sa gobyerno.
Kan nakalihis na Martes pormal nang nagtapos an paglilitis ni Yoon sa mga kasong insurrection, abuse of power, asin iba pang koneksiyon na pagbalgar makalihis an labi 11 oras na pagdangog sa korte.
Sa saindang closing arguments, pigladawan kan mga prosecutors na si Yoon an utak kan sarong “insurrection” na soboot bunga kan matinding pagmamawot sa kapangyarihan na obhetong magtatag nin diktatura asin panghaluyang pamamayo.
Sigun pa sa sainda, mayo soboot ipinahiling na pagbabasol an dating Presidente sa mga aksiyong nagbabanta sa constitutions asin demokrasya kan nasyon.
Maduon na pinahimutikan ni Yoon an mga paratang asin ipinagtanggol an saiyang mga lakdang komo legal asin makatuwiran.
Sigun sa saiya, obheto kan martial law na ipagtanggol an nasyon asin bako tanganing rauton an demokrasya.
Naghagad man an mga prosecutors nin habambuhay na pagkakakulong para sa dating defense minister na si Kim Yong-hyun, saro sa mga primerong akusado sa pagpapautob nin martial law bid.
Mientrastanto, piglalaomang iluluwas kan korte an hatol sa Pebrero 19, 2026.Si Kim an kaibahan sa walong indibidwal na pigkokonsiderar na ringleaders sa nasambitan ng insidente.
Kun mapatotoohang nagkasala, si Yoon an magigin ikatolong presidente kan South Korea na mahahatulan nin insurrection, kasunod kan duwang dating lider-militar na napatotoohang nagkasala katakod kan 1979 coup.
Siring man, alagad maski mawot ninda an death penalty, sadit an tyansa kaini huli ta bakong opisyal an moratorium kan nasyon pag-abot sa executions na nag-iiral puon pa kan taong-1997.
Apwera digde, naghahagad man an mga taga-usig nin 10 taong pagkakakulong kontra ki Yoon sa suhay na kaso kan obstruction of justice, na piglalaomang hahatulan kan sarong korte sa Seoul sa Biyernes.
