NAGA CITY- Saro sa tututukan kan pigkokondusir na imbestigasyon kan pigbilog na Special Investigation Task Group (SITG) Halili an impormasyon na igwa suboot naresibeng huma sa saiyang buhay an ginadan na si Tanauan City, Batangas Mayor Antonio Halili.
Sa entrevista kan Bombo Radyo Naga ki P/Supt. Chitadel Gaoiran, tagapagtaram kan Police Regional Office (PRO) 4-A, sinaysay kaini na dawa mayong nakakaabot sa saindang opisina nin report manungod sa death threats na suboot naresibe kan alkalde alagad kabale pa nanggad ini sa iimbestigaran kan SITG-Halili.
Mientrastanto, nagpapadagos man an ginigibong pagkua kan mga otoridad nin pahayag hale sa mga testigo sa nangyaring pambabadil siring man an CCTV Footages sa palibot kan bagong city hall kan Tanauan City para makatabang sa imbestigasyon asin sa marikas na pagkakabistuhan kan nagdulag na suspetsado.
Enot kaini, sinaysay ni Gaoiran na pinag-aandaman na kan PNP an gigibuhong re-enactment sa panggagadan sa nasambitang alkalde.
