Nagpakol na sa labi sa 80 katao an pag-ultanan kan missile asin airstrikes sa pag-ultanan kan Israel asin Iran.
Sigun sa Israeli authorities, tulong katao an binawian nin buhay sa Israel mantang 19 man an irido sa magkakasunod na pinakawarang missiles kan Iran.
Duwa an binawian nin buhay kaiba na an 19 na irido sa missile attack kan Iran na nagtama harani sa mga kaharungan sa Rishon Lezion, sa katimugang parte kan Tel Aviv.
An ikatulong indibidwal an gadan makalihis na mabagsakan kan pidaso kan missile kan Iran sa primerong bugso kan magdamagang missile strikes.
Pigdeklarar na gadan an biktimang babae sa siyudad kan Ramat Gan, na nasa sirangang parte kan Tel Aviv.
Pigreport man kan Iran na nasa 78 katao na an gadan gikan sa strikes kan Israel asin 320 an irido na kadaklan iyo an mga sibilyan.
Mientrastanto, nagpapadagos an paghahanap sa mga residente na posibleng na-trap sa mga establisyemnto na harani sa mga residential area kan Rishon Lezion na tinamaan kan missile strikes kan Iran.
Sigun sa National emergency response agency Magen David Adom (MDA), matinding nadanyaran an nagkapira sa mga establisyemento kan mag abot sinda sa lugar mantang an pira sa mga irido an na-trap sa mga nagrasay na edipisyo asin an iba man an naabutan nindang naglalakaw nin lugadan.
Enot kaini, liwat na nag siklab an tensiyon sa pag ultanan kan Iran asin Israel makalihis an sorpresang pag-atake kan Israel kan nakalihis na Biyernes sa nuclear asin military facilities kan Iran na ikinagadan kan pira sa haranglangaw na lider kan nasyon, rason kaya man nagbalos ini nin missile attack sa Israel.
