Ikinaogma kan defense team ni Vice President Sara Duterte an naging desisyon kan Korte Suprema na nagdeklarar sa mga artikulo kan impeachment kontra sa saiya komo unconstitutional.
Sigun sa opisyal na pahayag kan saiyang defense team, an desisyon kan Kataas-taasang Hukuman an nagpapatibay sa saindang pagtubod na an ika-apat na reklamong impeachment an igwang pagbalgar sa one-year ban na ipigtalaan kan Article XI, Section 3(5) kan 1987 Konstitusyon.
Hurot ninda, an unanimous decision an bako sanang trayumpo parasa Bise Presidente, kundi man sarong pagpapakusog sa rule of law asin abiso kontra sa salang paggamit kan proseso kan impeachment.
Pigsierto kan grupo na preparado sindang simbagon an anuman na alegasyon sa tamang panahon asin sa naaangkop na forum.
Enot digde, kan nakalihis na Disyembre 2024, apat na impeachment complaints an pigsunado kontra ki VP Duterte.
Kaibahan sa mga paratang an graft and corruption, betrayal of public trust, asin an kontrobersyal na pag-ako sa sarong assassination plot kontra ki Presidente Marcos, First Lady Liza Araneta, asin Speaker Martin Romualdez.
An ika-apat na reklamo an pigsunad kan nakalihis na Pebrero 5, 2025 asin pig-endorso kan 215 miyembro kan House of Representatives, kaya naipasar ini sa Senado para sa trial.
Alagad kan nakalihis na Hunyo 2025, nagdesisyon an Senado na ibweltada an mga artikulo kan impeachment sa Kamara, imbes na idagos an paglilitis.
Sa huri nagluwas nin desisyon an Korte Suprema na nagsasabing labag sa konstitusyon an ika-apat na reklamo huli sa pagbalgar sa one-year rule.
