Aram baya nindo mga ka-bombo, napili kan Dictionary.com an tataramon na ‘demure’ komo 2024 word of the year.
Dinaog kaini an mga tataramon siring kan “brainrot”, “brat” asin “Weird”.
An tataramong “Demure” kaya an naglangkaw an paggamit kaini kun saen puon Enero hasta Agosto an igwang paglangkaw na 1,200 percent.
Nagsikat pa lalo an tataramon kan pirming piggagamit kan sikat na Tiktoker asin beauty influencer na si Jools Lebron.
Pirmi kaya kaining nagagamit an tataramon sa paagi kan “very demure, very mindful” na pirming napapaiba sa mga video kaini.
Sigun sa Dictionary.com na an tataramong “Demure” an nagagamit tanganing tukuyon an discrete o nakatagong pag-uugali.
Panibago ining nagagamit sa social media na pigkokonektar sa kaanyuhan kan sarong tawo asin an paagi kun pano ini maggibo sa mga pampublikong lugar.
Magin an mga sikat na personalidad siring ninda Kim Kardashian, Jennifer Lopez, asin “Drag Race” host RuPaul an nagsakay man sa kasikatan kan tataramon sa paagi kan paggamit kaini tanganing maipromote an saindang mga clothing brand.
