Pigsuhestyon kan Department of Economy, Planning, and Development (DepDev) an paggamit nin variable tariffs komo posibleng solusyon tangani maprotehiran an mga paraoma sa pabagu-bagong presyo nin paroy asin masiguro an baratong bagas para sa mga parabakal.
Sigun ki DepDev Secretary Arnesio Balisacan, kaipuhan nin sarong panghaluyang solusyon na dae magigin pagabat sa ekonomiya asin makakatabang sa katatagan kan presyo para sa mga paraoma.
Tinukoy kaini an pagbabalik kan Most Favoured Nation (MFN) tariff rate sa 35% na posibleng magpalangkaw nin presyo kan bagas asin magkawsa nin inflation. Marurumdumng kan nakalihis na Hulyo kan pababaon an presyo.
Alagad sigun sa dating kongresistang si Joey Salceda, mas nakinabang soboot digde an mga importer asin trader, asin bako an mga konsumer o paraoma.
Mientrastanto, pigsierto man ni Balisacan na an 60-aldaw na suspensyon kan rice importation na ipinautob magpuon kan Setyembre 1 an dae makakaapektar sa inflation, huli ta igwa nin bastante na buffer stock an nasyon para sa 40-aldaw asin man nilalaoman an marahay na ani kan paroy ngunyan na season.
Enot kaini, pinagsugo ni Presidente Ferdinand Marcos Jr. an suspensyon nkan pag-aangkat nin bagas tangani tawan proteksyon an mga lokal na paraomang bumabagsak an kita huli sa hababang presyo nin paroy, na gikan P24.93 kada kilo kan nakalihis na 2024 nagbaba sa P16.99 kan nakalihis Hulyo 2025.
