NAGA CITY- Piglaoman na kan Department of Education Bicol an pagbaba sa nakuang gintong medalya kan mga atletang Bikolano sa kakatapos pa sana na Palarong Pambansa 2025.
Sa entrevista kan Bombo Radyo Naga ki Francisco Dexter O. Sison, Regional Sports Office kan DepEd Regional Office V, sinaysay kaini na kulang sa training an mga atleta orog na ta nagkaigwa nin delay sa pagkundusir kan Palarong Bicol na iyo man an pangenot na lakdang antes na mabilog an team na masabak sa Palarong Pambansa.
Apwera digde, kadakol man na mga factors an nakapag-kontribwer kun tano nagpakol sana sa anom na gintong medalya an saindang naipuli asin nasa ika-13 na ranking sa pangkabilugan an Bicol Region.
Alagad sa ibong kaini, mas importante soboot an mga nakuang adal kan mga atleta siring kun pano an pag-ako nin kadaugan asin an pagkakaigwa nin disiplina sa gabos na bagay.
Dakulang bagay na an eksperyensiya kan mga kaakian na magagamit pa ninda sa mga masunod na pagsabak sa torneo.
Mientrastanto, an mga huma na kinahampang kan team bicol sa Palarong Pambansa 2025 an magigin panalmingan sa mga masurunod na taon tanganing magkaigwa nin mas magayon na improvement sa lado kan mga atleta magin sa mga coaches siringman sa gabos na mga tawong imbwelto digde.
Sa ngunyan, pigsierto na sana ni Sison na yaon an saindang pagsuporta sa mga atletang Bikolano para sa mas ikakarahay kan mga ini.
