NAGA CITY – Maogma an DEPED Camarines Sur huli ta dakula an magigin pondo kaini sa 2026.
Sa entrevista kan Bombo Radyo Naga ki Atty. Salvador Bogs Pelingon, Division Information Officer, Deped Camarines Sur pigkokonsederar kaining dakulang trayumpo kan DEPED an dakulang pondo na pipirmahan pa kan mga lehislador huli ta masisimbagan na an mga kakulangan sa classrooms, learning materials asin iba pa.
Apwera kaiyan, dakulang trayumpo man an kadakol an napromote na mga paratukdo antes matapos an taong 2025.
Pigkokonsederar man ining sarong development sa ladangan kan pagtutukdo asin magayon na tabang sa mga paratukdo.
Pigsaysay man ni Pelingon na haros 10,000 an nagpasa nin application for promotion asin igwa nin 6,000 na nagin qualified asin promoted na.
Pagpapaliwanag man kaini na an mga natatada an nasa listahan naman kan magigin prayoridad sa nasambitan na promotion.
Puwedeng an iba man na dae pa nakabali sa promotion an mga dae nakaabot sa cut off na mga popondohan.
Dugang pa ni Pelingon na bakong masakit an pagpapromote sa ladangan kan pagtutukdo basta kwalipikado an paratukdo sa education, training, experience, performace rating asin demo teaching huli ta iyan soboot an focus kan Authority sa pagpili kan mga mapopromote, asin ini nag-aagi sa nag-iiral na ley.
Sa presente mas piglalapigutan pa kan DEPED Camarines Sur na madugangan an classrooms, buildings na kun saen technologically ready na para sa mga estudyante.
Mientrastanto, padagos man an progression kan DEPED ngunyan na patapos na an 2025 asin naglalaom man si Pelingon na mas dakol pa an mapopromote sa masunod na taon.
Sa ngunyan, nagpagirumdom man an opisyal na enkaso igwang transaction sa saindang opisina liwat ining mabukas sa maabot na Enero 5, 2026.
