NAGA CITY- Nagpapadagos an preparasyon na pigsasagibo kan Department of Education Camarines Sur para sa ikukundusir na Regional Press Conference sa masunod na semana sa Legazpi City.
Sa entrevista kan Bombo Radyo Naga ki Atty. Salvador Bogs Pelingon, Division Officer kan DepEd-CamSur, sinaysay kaini na labi 300 na paratukdo asin coaches an mapartisipar sa aktibidad.
Sigun pa sa opisyal an delegasyon kan Camarines Sur na pinapangenotan kan Filipino asin English supervisor, puspusan an ginigibong preparasyon tanganing maipuli an kampeonato sa nasambitan ng kompetisyon na presenteng pigkakaputan kan Tabaco City.
An Regional Press Conference taon-taon na pigkukundusir kun saen naglalaban-laban an mga estudyante sa pampubliko asin pribadong eskwelahan pag-abot sa pagsurat nin bareta o journalism asin radio broadcasting.
Dugang pa ni Pelingon, kamawotan kan DepEd-CamSur na mag-improve pa an saindang partisipasyon sa kompetisyon asin maisabak an mga estudyante sa siring na event tanganing mahasa an saindang mga kakayanan.
Mientrastanto, kabali man sa mga event na isasagibo an pagsurat nin bareta, photo journalism, editorial, headline writing asin iba pa.
Sa ngunyan, naglalaom na sana an opisyal na magigin matrayumpo an pagsabak kan DepEd CamSur sa nasambitan ng aktibidad.
