Pig-aasikaso na kan DepEd-CamSur an mga pangangaipuhan kan mga paratukdo na maserbe sa 2025 National and Local Elections.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd-Camsur, sinaysay kaini na nagpaluwas na soboot an Regional Office nin memorandum kun saen nakapalaog digdi na masairarom sa training an mga paratukdo.
Katakod kaini, liwat na pinagirumduman kan opisyal an mga teachers na pigtutugutan sanang magserbe kun an mga ini an mayong political interest, mayong kapamilya na nagdadalagan sa anuman na posisyon hasta sa 4th degree Consanguinity asin dapat mayong pigsusurugan sa siisay man na pulitiko.
Sigun ki Pelingon, importante na masunod an mga nasambitan ng panundon nin huli ta ini an nakapalaog sa ley asin sa constitution na padagos na pigsusunod sa halawig na panahon.
Dugang pa kan opisyal, piglalaoman na sa paagi kan mga paratukdo, magkakaigwa nin marhay, malinig asin matuninong na eleksyon sa masunod na bulan kan Mayo.
Sa ngunyan, pangapudan na sana kaini sa mga maserbeng paratukdo na pirmeng magin tapat sa saindang pigsumpaan na responsabilidad tanganing dae mabugtak sa alanganin na sitwasyon.
