NAGA CITY – Paghali kan corporal punishment sa mga estudyante posibleng huli sa nagkapirang insidente na nagkawsa tanganing magpundo sa pagklase an mga ini.
Sa entrevista kan Bombo Radyo Naga ki Atty. Salvador “Bogs” Pelingon, Division Information Officer kan Department of Camarines Sur, sinaysay kaini na igwa kaya nin mga nakaabot saindang report kun sain nasobrahan sa padusa an mga paratukdo na nagkakawsa nin trauma sa mga kaakian.
Ini man an piglilikayan kan DepEd na liwat na mangyari kun kaya pigpopromoter ninda ngunyan an positive discipline.
Dugang pa ni Pelingon, napatotoohan kaya soboot na enkaso an corporal punishment an pigpapautob nagkakawsa ini kan pagkawara kan integridad kan mga aki na nagigin rason tanganing magpundo sinda sa pagklase huli sa kasusupgan na naeksperyensyahan ninda sa eskwelahan.
Huli digdi, pinagmarhay kan departamento na halion na an corporal punishment asin dae na dapat na magin parte kan sibilisadong mga eskwelahan an paagi kan pagpapadusa na nagdedegrade sa mga estudyante kaini.
An pag promotir man sa positive discipline an paagi kan pag-aram ninda sa mga rason kan problema sa halip na padusahan an mga aki na dae man naaaraman kun ano an saindang rason.
Katakod kaini, pigbilog an Child Protection Committee na responsable man sa pag-imbestigar enkaso igwa nin mga aki na nagkakaigwa nin problema sa laog kan mga eskwelahan.
Boot sana kaining sabihon na enkaso mahampang an sarong aki sa padusa nag-agi na ini sa hararoman na pag-iimbestigar.
An mga padusa man na kakahampangon kan sarong estudyante para sa light offense an pagsasabihan muna an aki asin ipaliwanag na dae ini dapat na gibuhon; sunod man digdi an pagsuspinder sa estudyante depende sa gabat kan saiyang bayolasyon.
Pantolo, enkaso an sarong aki an naimbwelto sa bullying, irerequire ini na magin parte kan mga pigkokondusir na community service komo padusa sa saiyang nagin bayolasyon. Mantang an pinakamagabat an expulsion o an pagsikad sa sarong estudyante gikan sa saiyang eskwelahan kan saindang principal na habu man ninda na maipataw sa sarong aki.
