NAGA CITY- Pigheras kan DepEd-Iriga an mga alternatibong paagi kan pagtutukdo na saindang ginigibo enkaso igwang bagyo o maraot an panahon.
Sa entrevista kan Bomb Radyo Naga ki Rommel Velasco, Head Teacher I kan Alternate Division Information Officer kan DepEd-Iriga,sinaysay kaini na tuyong nagkakaigwa nin suspension kan klase huli sa pagtama kan mga kalamidad nagsasagibo man soboot sinda kan pig-aapod na extension kan klase.
Ini an tanganing mapanuan an mga aldaw na nasayang huli sa nasambitan ng mga sitwasyon.
Alagad, sigun ki Velasco, an extension of classess an nakadepende pa sa kasuguan gikan sa higher office.
Dugang pa kan opisyal, an saindang mga paratukdo an nagpapadara man nin module sa mga kaakian, online class o kaya nagpapadara nin mga kinakaipuhan activites sa saindang mga group chat.
Digde soboot nagmomonitor an mga paratukdo sa update asin progress kan saindang mga estudyante.
Paliwanag ni Velasco, sa paagi kaini maski mayong face to face classess dae man nasasayang an oras kan mga kaakian. Mientrastanto, maogma man na pigheras kan opisyal na mayo man nairehistro na danyos an nakalihis na pag-uuran sa saindang eskwelahan orog na ta yaon man an suporta gikan sa saindang lokal na gobierno.
Sa ngunyan, pigsierto na sana ni Velasco na padagos an saindang ginigibong mga lakdang tanganing mapalangkaw an lebel kan pagkanood kan mga estudyante sa saindang siyudad.
