NAGA CITY- Pigsisimbagan na kan pamayuhan kan Department of Education Iriga an dapit sa problema sa tubig sa sarong eskwelahan sa saindang dibisyon.
Sa entrevista kan Bombo Radyo Naga ki Dr. Mariano De Guzman, Schools Division Superintendent, DepEd Iriga, sinaysay kaini na bakong potable water an suplay kan tubig sa sarong eskwelahan sa Sagrada nin huli ta kan nakalihis na bakasyon pigkalwagan soboot an linya kaini kun kaya naputol asin kaipuhan na sugpunon liwat.
Sigun ki De Guzman sa ibong kaini, igwa pa man giraray tubig na napagkukuanan huli ta nakakonektar sinda sa barangay.
Katakod digde, nakatalaan na ipakarhay an nasambitan ng linya kan tubig tanganing magamit kan mga estudyante asin padagos na pigpapagirumduman an mga kaakian na magdara kan saindang maiinom na tubig.
Mientrastanto, nanindugan man an DepEd Iriga na igwa man kakulangan sa classroom alagad ini an kayang maneharon sa presente.
Dae soboot maabot sa pagklase sa irarom kan puon nin kahoy an mga estudyante orog na ta sainda man pigigibuhan nin paagi tanganing magkaigwa nin paramientras na lugar na malalaogan an mga kaakian.
Sa ngunyan, padagos an pagmonitor kan opisyal sa sitwasyon sa mga eskwelahan sa saindang dibisyon tanganing tolos na magibuhan nin paagi enkaso igwang magbungkaras na problema.
