NAGA CITY- Pig-enkaminar pamayuhan kan DepEd-Naga an publiko na magin alerto sa saindang kapalibutan makalihis an napabaretang pagpurbar na pagdukot sa mga sarong estudyante asin aki sa may parte kan Barangay Del Rosario, Cararayan asin Concepcion Pequeña.
Marurumduman, nagkuriyat an baretang igwa soboot aking pigpurbaran na dukuton sa parte kan rotonda na sakop kan Concepcion Pequeña kun saen lunad an mga ini nin puting van.
Mantang sa Barangay Del Rosario kan nakalihis na Domingo an igwa soboot umano na pinagtutubudan na madukot man sa 10-anyos na aki makalihis na tangruon na maglunad sa motor makalihis na suguong magbakal nin sigarilyo.
Sa entrevista kan Bombo Radyo Naga ki Dr. Susan Collano an Division Superintendent kan DepEd-Naga, sinaysay kaini na tolos man sindang nakipag-koordinar sa Naga City Police Office tanganing imbestigaran an pangyayari asin tanganing mabantayan an kasalbaduhan kan mga estudyante.
Dugang pa kan opisyal, saindang pigdumanan an Julian B. Meliton Elementary School tanganing kaulayon an aking imbwelto sa insidente asin siertuhon na nasa marhay ining kamugtakan.
Pigtawan duon pa kan opisyal na padagos an saindang paggirumdom sa mga magurang na bantayan nin marhay an saindang aki, magin mapagmasid kan saindang kapalibutan siringman tolos na ipaabot sa mga kapulisan kun igwang nahiling na kahina-hinalang mga tawo.
Sa ngunyan, kamawotan na sana ni Collano na magin salbado an gabos orog na sa presenteng taon na naglipana an mga tawong mararaot an boot.
