Piganunsiyar kan Bureau of Immigration (BI) na masunad ini nin deportation case kontra sa sarong 41-anyos na Chinese national na soboot nag-import kan luxury vehicles kan mag-agom na Curlee asin Sarah Discaya.
Sigun ki BI Commissioner Joel Anthony Viado, pig-arestar an suspek kan Nobyembre 27 sa Makati huli sa illegal use of alias, obstruction of apprehension, false representation, asin misrepresentation of material information. Ini an presenteng nakadetine sa Special Operations Division kan Highway Patrol Group sa Camp Crame.
Pig-imbestigaran kan Land Transportation Office (LTO) an paggamit kan suspek kan ibang pangaran sa mga record, asin pigtawan duon na an paggamit kan pekeng identidad nagpapahiling na an sarong dayuhan “undesirable” sa nasyon.
Dugang pa ni Viado, ililipat an suspek sa BI facility sa Taguig makalihis an inquest asin medical examination. Kun mapatotoohan an mga kaso, mahampang ini sa deportation asin blacklisting.
