NAGA CITY– Personal na nagbisista nguniang aldaw sa probinsya nin Camarines Norte si Police Deputy Director General Ramon Apolinaro, Deputy PNP chief for administration tanganing tawan nin honra an mga pulis na nabiktima nin pananambang kan pigtutubudang mga rebeldeng NPA o inaapod na ngunian na “terroristang grupo” ni Presidente Rodrigo Duterte basado sa ipinaluwas na Presidential Proclamation kan December 5,2017.
Sa nagunong impormasyon kan Bombo Radyo Naga gikan ki SPO2 Sheralyn Samonte kan Camarines Norte Police Provincial Office (CNPPO), sinaysay kaini na alas-11 kasubago kan magkaigwa nin arrival honor asin programa kun sain ipigtao an medalya ng kagitingan sa mga personahe kan Daet-PNP na kaibahan sa duwang police mobile na tinambangan kan mga pigtutubudang miyembro kan rebeldeng New People’s Army (NPA).
Apwera digdi, pig-turn-over man suboot ni Apolinario an kinakarkulong maabot sa 40 rifles sa CNPPO.
Meintrastanto, kasabay man sa mga aktibidad ni Apolinario sa nasambitan ng lugar an pagbisita kaini sa mismong bilar ninda PO2 Richard Abad asin PO1 Pedro Valeros na binawian nin buhay sa nasambitan ng insidente.
Kun marurumduman, aldaw nin Sabado kan pabalik na kuta na sa headquarters kan CNPPO an tropa kan Provincial Public Safety Company (PPSC) kan tambangan kan mga armadong kalalakihan pag-abot sa Barangay Daguit kun sain tulos na nagadan si PO2 Abad mantang irido man an anom na iba pa.
