NAGA CITY- Dapat suboot na irespeto kan gabos an naging desisyon kan House Committee on Justice na sufficient in grounds an pigsangat na impeachment complaint laban ki Supreme Court (SC) Chief Justice Maria Lourdes Sereno.
Ini an tinawan doon ni Sen. Kiko Pangilinan sa entrevista kan Bombo Radyo Naga.
Sigon sa senador, komo parte kan proseso na nakapalaman sa Konstitusyon, dapat na irespeto an nasambitang desisyon kan Kamara dawa na dae sinda nagpapabor digdi.
An impeachment complaint laban ki Sereno, igwa nin koneksyon sa iba pang mga nangyayari sa nasyon.
Halimbawa na sana suboot digdi an pagtatao nin P1,000 na budget kan Kamara sa Commission on Human Rights (CHR), an pagpapa-impeach ki Ombudsman Conchita Carpio-Morales huli sa ginigibong imbestigasyon kan opisina kaini asin an planong pagsasangat nin kaso laban sa nagkapirang mga independent minded na miyembro kan Supreme Court.
Sigon ki Pangilinan, nagluluwas na saro-sarong inaatake, binu-bully asin ini-intimidate an mga intitusyon sa Pilipinas urog na kun dae an mga ini nagpapabor sa nagkapirang polisiya kan Duterte Administration.
