Suportado kan gobyerno kan Quezon City an desisyon ni Presidente Ferdinand R. Marcos Jr., na ipagpauktaba an rehabilitasyon kan Epifanio de los Santos Avenue (EDSA), saro sa mga pinakasibot na agihan sa Metro Manila.
Marurumduman kan nakalihis na aldaw, sinaysay ni Presidente Marcos an sarong bulan na suspensiyon sa planong ganap na rehabilitasyon kan EDSA, na orihinal na nakatalaang papuonan sa Hunyo 13.
Katakod kaini, tinawan duon kan Presidente an pangangaipuhang aramon an mga bagong paagi na pwedeng paliputon an haloy kan proyekto aain mabawasan an abala sa publiko.
Mientrastanto, tinawan duon kan chief executive an pangangaipuhan man na liwat surion an cost-benefit kan duwang taong rehabilitasyon na proyekto, na binanggit an magabat na pasanon sa trapiko na ipapataw kaini sa nasa 100,000 mga commuter asin motorista na naggagamit kan mayor na tinampo.
Tinawan duon man kan gobyerno kan Quezon City an importansya kan pagkakaigwa nin malinaw asin mahusay na plano para sa rehabilitasyon kan EDSA, na nagpapahiling nin importansya kaini, bako sana sa mga tuntunin kan panghaluyang benepisyo kaini kundi pati na man sa abala na pwedeng makawsa kaini sa pagpapautob.
Siring pa man, nagpahayag ini nin paglaom na an mga makabagong teknolohiya asin man mga makabagong estratehiya an pwedeng makatabang sa makabuluhang pahaliputon an timeline kan proyekto, gikan sa naenot na pinaglalaomang duwang taon hasta sa posibleng anom na bulan na sana.
Sinaysay kaini na sa wastong pagpaplano asin man paggamit nin epektibong paagi kan pagpapatugdok, nagtutubod an lokal na gobyerno na an epekto sa pang uru-aldaw na buhay asin ekonomiya ay pwedeng mabawasan nin labi.
Napagaraman na sa 23-km ng EDSA, nasa 11 kilometro kaini an nag aagi sa Quezon City.
