NAGA CITY – Nagin motibasyon kan ranked 4th sa 2025 Bar Examination iyo an pagkakaigwa nin determinasyon, consistency, asin masarig na tiwala sa Kagurangnan tanganing magtrayumpo.
Sa entrevista kan Bombo Radyo Naga ki Atty. Angelica De Castro Mitra, ranked 4th, 2025 Bar Examination gikan sa Dela Salle, Lipa sa Batangas sinaysay kaini na ‘overwhelming’ asin sobrang kaogmahan an saiyang namatean kan mapabilang an saiyang pangaran sa listahan kan mga top notchers huli man ta dae soboot kaini piglalaoman na sa ibong kan rinibong nagsairarom sa eksaminasyon, sarong simpleng probinsiyana an makakaiba sa top 10.
Dugang pa kaini na sa ngunyan, ‘pressured’ na an saiyang namamatean huli man ta garo iba na an paghiling kan mga tawo dara kan pagkakapasar kaini sa bar exam asin pang-apat pa sa ranggo kan mga nakapasar.
Pigheras pa ni Mitra na maski kaito pa antes na magklase kan saiyang college degree na BS Accountancy pangarap na talaga kaining magklase nin law, huli man ta pigkokonsiderar kaini na an pagigin abogado, pigtitingala sa lipunan asin nagtatabang sa mga nangangaipuhan.
Nagtutubod pa si Mitra na kun igwang sarong tawo na igwang aram sa batas, makakatabang ini na maaraman kan mga ordinaryong mamamayan kun ano an saindang karapatan asin maaraman an saindang obligasyon komo miyembro kan sambayanang Pilipino.
Mientrastanto, pigtawan-duon pa kaini na apwera sa pagre-review tanganing makapasar, dapat yaon man determinasyon, consistency asin masarig na tiwala sa kagurangnan tanganing magtrayumpo sa anuman na kamawotan asin malampasan gabos na pinag-aagihan.
Sa ngunyan, abiso na sana ni Mitra orog na sa presenteng nasa law school ngunyan na isipon na sana na makalihis kan gabos na sakit, mayong turog, asin pressure bandang huri igwang marhay na karibay asin pirmi sanang magin positibo dapat sa buhay.
