Piglangkaw na kan gobyerno kan Pilipinas an crisis alert level 3 sa Israel asin Iran.
Huli digdi, pig-enkaminar kan Department of Foreign Affairs (DFA) an mga obrerong Pinoy na nasa Iran asin Israel na tumugon sa pangapodan sa voluntary repatriation.
An crisis level 3 o voluntary repatriation an pigbanderar kan gobyerno kan Pilipinas sa mga nasyong igwa nin naglalalang kariribukan.
Igwa nin nasa 30,000 na mga Pinoy workers an nasa Israel na kadaklan an mga caregivers mantang igwa man nin labi 1,000 an nasa Iran.
Sigun sa DFA na an isay man na OFW na intersado na mag-ebakwar an pwedeng makipag-koordinar sa embahada tanganing ayuson an saindang pagbalik sa nasyon.
Marurumdoman, pirang semana ng nagriribayan nin missile an Iran asin Israel kun saen kadakol nin mga sibilyan na an naiipit sa kariribukan
