Pigsierto kan mga opisyal kan Department of Foreign Affairs (DFA) na mayong dapat ikahadit an mga Pilipino makalihis na ilangkaw na an antas kan alerto sa antas 3 sa Iran asin Israel kawsa kan tensyon sa pag ultanan kan duwang mga nasyonn.
Sa sarong pulong balitaan, inihayag ni Foreign Affairs Assistant Secretary Robert Ferrer na kawsa kan misinformation an nangyayaring panic asin distress na namamatian kan mga pilipino asin magin kan saindang mga pamilya na nawalat sa Pilipinas.
Paliwanag kan opisyal, an pagdedeklarar nin Alert Level 3 kan Iran asin Israel an parte sana kan saindang preparasyon enkaso man na maglala pa an tensyon sa pag ultanan kan duwang nasyon.
Kasunod kaini, binasa man ni Ferrer an parte kan mensahe ni Philippine Ambassador to Israel Aileen Mendiola na sa ibong kan mga nakaambang na peligro, padagos na nagpapaabot nin mga essential services asin assistance an saindang ahensya asin pigsierto na matinir na bukas an embahada tangani magpaabot nin serbisyo sa mga kahimanwang Pilipino na naiipit sa iriwal.
Sigun pa ki Ferrer, mayo man nin interruptions sa mga internet services, telepono asin iba pang mga utilities sa Israel asin kumpyansang man an mga residente kun saen nasisimbagan nin marikas an mga apektado asin nangangaipuhan nin tabang.
Mientrastanto, pigsierto man kan opisyal sa mga pamilya kan haros 30,000 na mga Overseas Filipino Workers (OFW’s) sa Iran asin Israel na enkaso pakrahay na asin tapos na an kariribokan, pwede nang magbweltada sa saindang mga normal na buhay asin pagtatrabaho an saindang mga mahal sa buhay.
