Nagheras nin mga paagi an DICT Camarines Sur tanganing makalikay an publiko sa online scam ngunyan na kapaskuhan.
Sa entrevista kan Bombo Radyo Naga ki Engineer Clint Vincent Gregorio, Free Wifi Project Focal, DICT-Camarines Sur, sinaysay kaini na an mga scammers mas active ngunyan na Holiday season.
An kadalasan na target kan mga ini iyo an mga e-wallets asin iba pang online accounts kan sarong indibidwal na obhetong makakua nin kwarta.
Katakod digde, liwat giraray nag-abiso an nasambitan ng ahensiya sa publiko na dae mag click kan mga narereseber na link siringman dae pag itao an mga personal na impormasyon tanganing dae mabiktima kan mga scammers ngunyan na kapaskuhan.
Sigun pa ki Gregorio apwera sa pagtataong abiso, padagos man an pigsasagibong ncyber security awareness seminar kan DICT-CamSur sa mga eskwelahan, lokal na gobierno asin iba pang National Agency sa probinisya.
Pigtutukdo digde an mga dapat na gibuhon tanganing malikayan an manlaen-laen na klase kan scam.
Dugang pa kan opisyal, yaon man an saindang pakikipag-koordinar sa PNP Cybercrime Unit tanganing mapapusog an kampanya kontra cybercrime.
Sa ngunyan, pig-enkaminar na sana ni Gregorio an publiko na tolos na ipaabot sa mga otoridad enkaso mabiktima nin scam para sa mas marekas na aksyon.
