Nagpatanid an Department of Information and Communications Technology (DICT) sa publiko dapit sa piglalaomang mahewasang “traffic flood” o Distributed Denial of Service (DDoS) attack sa internet sa maabot na Nobyembre 5, sarong klase kan cyber assault na pwedeng magdara nin matinding pagkauktaba sa pag-access kan mga website asin apps.
Pigkumparar ini kan DICT sa sarong matinding traffic jam sa internet: sabay-sabay na pigpoporbarang laugon kan mga hacker an sarong website o application na nagreresulta sa pagluya kan serbisyo o dae tulos mabukasang site/app na garo pigtutuyong isarado an agihan sa mga lehitimong naggagamit.
Alagad maski nilinaw kan DICT na mayong personal na account, datos, o kwarta an mga parahabon sa siring na sitwasyon, dae maikakaila an epekto kaini sa mga negosyo, serbisyo, asin pang-ara-aldaw na online na gibuhon kan publiko.
Pigsierto kan DICT na mahigot na pigmo-monitor an sitwasyon asin nakapreparar an mga kaukulang lakdang tanganing mapugolan an mas mahewas na epekto kan cyber attack.
