Nagpromesa asin nanindugan an Departmet of Interior and Local Government (DILG) asin an National Police Commission (NAPOLCOM) na mayo sindang sasantuhon sa presenteng ongoing investigation sa kaso kan mga nawawarang sabungero.
Sa nagin pagbisita ni Interior and Local Government Secretary Jonvic Remulla sa kampo kasuodma para sa isinagibong simex kan 5 minute response time kan Philippine National Police (PNP), sinaysay kaini na mayong sasantuhon an mangyayaring imbestigasyon sa kaso kan mga nawawarang sabungero tanganing masierto na magigin pantay ini para sa gabos.
Dae soboot kaini sasantuhon maski mayor, governor, o maski senador, basta mapatotoohang kaibahan sa Alpha Group sisiertuhong mapapanimbag asin dae makakalampas sa ley.
Naenot na man digdeng pigkumpirmar ni Remulla na nakapagtao na si Julie “Dondon” Patidongan nin listahan kan mga personalidad na iyong kaibahan sa nasambitan ng grupo asin presenteng under verification na kan Department of Justice (DOJ).
Mientrastanto, nakapreparar man an saindang opisina katuwang an NAPOLCOM asin magin an DOJ sa pag-ako kan mga counter affidavit kan doseng pulis na isinangkot ni Patidongan sa kaso kan mga nawawarang sabungero.
Nakatalaan soboot na magsumiter an mga pulis kan saindang counter affidavit maski anumang oras kun saen nakadepende man sa laog kaini an masunod na lakdang kan mga ahensiyang nag-iimbestigar sa nasambitan ng kaso.
Paliwanag ni Remulla, maagi sa normal na proseso an mga affidavit kan mga pulis asin magin si Patidongan mantang an DOJ asin an DILG man an nasa proseso na kan pagsasagibo nin case build up tanganing matawan nin sarong rasyonal na solusyon an pagkidnap asin pagkagadan kan mga sabungero.
Sa presente man, padagos sa pagtatao an PNP asin an NAPOLCOM nin bastante na proteksiyon ki Patidongan komo sulamenteng state witness asin whistleblower sa kaso.
Nagkapira man sa mga pangaran na pigbuyagyag ni Patidongan an nag-alma asin pinahimutikan na imbwelto sinda asin igwang kinaaraman sa kaso kan pagkawara kan mga biktima asin presente nang pighahagadan nin pahayag.
Igwang bastante na man na kaaraman asin impormasyon an DOJ para man sa mga personalidad na kaibahan sa Alpha Group basado na man sa mga pigsumpaan na salaysay ni Patidongan.
