Inako ni DILG Sec. Juanito Victor “Jonvic” Remulla na nadismaya ini sa imbestigasyon na isinagibo kan Iloilo City Police Office katakod sa pagkagadan ni Dueñas Vice Mayor Aimee Lamasan.
Sigun ki Secretary Remulla, nag-abot pa nin 36 na oras makalihis na magadan an biktima antes nagsagibo nin imbestigasyon an ICPO.
Ini an rason soboot kun tano personal ining nagpasiring sa Iloilo kaibahan sinda PNP Acting Chief Lieutenant General Jose Melencio Nartatez Jr. asin CIDG Acting Director Major General Robert Alexander Morico II tanganing tutukan an kaso.
Pahayag ni Secretary Remulla, importanteng tulos na maimbestigaran asin ma-secure an crime scene sa gabos kan insidenteng igwang kinaaraman sa pambabadil tanganing matukoy tulos an tunay na rason kan pangyayari.
Siring man, sa kaso ni Vice Mayor Lamasan, huili sa pagkaantala kan imbestigasyon, kinakaipuhan pang i-recreate kan mga otoridad an bilog na pangyayari.
Dugang pa ni Remulla, makalihis na surion an gabos kan affidavits, nakumpirmar na accidental firing an nangyari asin mayong nahiling na foul play sa pagkagadan kan bise alkalde.
