Nagapelar si Akbayan Party-list Representative Chel Diokno sa hudikatura na parikason an pagresolbar sa mga kasong may koneksyon sa katiwalian asin korapsyon, sabay hayag kan bilog na suporta sa mga mekanismong maparikas sa proseso nin paninimbagan asin pagpapautob nin mga hatol.
Sa pigkundusir na plenary deliberations para sa propwestong 2026 budget kan hudikatura, kinumpronta ni Diokno si Cagayan de Oro Representative Rufus Rodriguez, na iyong sponsor kan budget kan judiciary, dapit sa mga lakdang tangani simbagan an haloy nang pagkauktaba sa pagdangog asin pagresolbar kan mga kaso kan katiwalian.
An pahayag ni Diokno an kasunod kan naglalalang kaanggutan kan publiko sa mga iregularidad sa mga infrastructure projects, partikular na sa mga flood control projects, na inuuran nin alegasyon kan overpricing, substandard na pagpapautob, asin “ghost projects.”
Nagkukusog an pangapudan para sa reporma, orog na sa mga lugar na pauru-utro na binabaha sa ibong kan pauru-utro na pagtatagama nin pondo para sa disaster mitigation.
Simbag man ni Rep. Rufus Rodriguez na iyong sponsor sa budget kan Hudikatura, saiyang sinabi na presenteng bumabalangkas an Sandiganbayan nin bagong panundon tangani paliputon an panahon kan paglilitis sa mga kaso nin katiwalian sa laog sana kan 120 aldaw.
Apwera digde, nangapudan si Diokno sa hudikatura na magtatag nin permanenteng database monitoring system na may koordinasyon sa manlaen-laeng ahensya tangani masiguro na an mga opisyal na nahatulan na nim pinal na desisyon an tunay na nagsisirbi kan saindang sentensiya.
Pigheras man ni Rodriguez na igwang Justice Sector Convergence Program an hudikatura, alagad ini an nabawasan an pondo gikan sa P475 milyon na orihinal na propwesto, pasiring P175 milyon sa 2026 budget.
