NAGA CITY- Pigsairarom kan Regional Disaster Risk Reduction and Management Council Bicol an Emergency Operation Center sa blue alert status tanganing masierto an kapreparaduhan sa panahon kan emerhensiya sa pag-obserbar kan All Saints’ Day asin All Souls’ Day sa Nobyembre 1 asin 2.
Sa memorandum na pigpaluwas, sinaysay ni RDRRMC-5 chairperson asin Office of Civil Defense Director Claudio Yucot na an nasambitan ng alerto an epektibo puon ngunyan na aldaw nin Martes, Oktubre 28, 2025 hasta sa Nobyembre 3.
Dugang pa kan opisyal, gabos na regional line agencies asin local Disaster Risk Reduction and Management councils kaipuhan na imantinir an saindang response operations sa nasambitan ng peryodo.
Kabali digde an regular na pagkundusir kan monitoring asin pagsumiter nin standard reports sa RDRRM Operation Center sa mga nairerehistro na insidente o iba pang pangyayari.
Pigsugo naman ni Yucot an gabos na technical staff asin response personnel na magpreparar asin siertuhon na available sa operations centers, tanganing masierto an ekipahe na kinakaipuhan kabali na an hotline numbers asin email addresses.
An mga Response assets kaipuhan na naka-deploy sa mga areas na kaipuhan katabang an iba pang mga ahensiya kan gobierno.
Sa ngunyan, pig-enkaminar na sana ni Yucot an publiko na magtinir na alerto tanganing magin matuninong sana an pag-obserbar kan Undas ngunyan na taon.
