NAGA CITY- Pigbandera kan Regional Disaster Risk Reduction and Management Council Operations Center an saindang alert status gikan blue pasiring sa red status komo preparasyon sa papaabuton na Peñafrancia Festival 2025 sa siyudad nin Naga.
An nasambitan ng red alert status an epekto puon kasuudma hasta sa September 22.
Sigun ki Claudio Yucot, Director kan Office of Civil Defense-Bicol asin chairperson kan Bicol RDRRMC, an mga ahensiya asin lokal na gobierno an dapat na mag-implementar nin mga lakdang para sa kapreparaduhan sa nasambitan ng okasyon.
An mga Response agencies na igwang resources na dae pa pigdeployi sa Naga City an kaipuhan na magin alerto asin prepatado para sa posibleng deployment kun kinakaipuhan.
Katakod digde, pig-enkaminar ni Yucot an publiko na magtinir na vigilant tanganing masierto an matuninong asin matrayumpo na selebrasyon kan festival.
Labi 2,500 personnel gikan sa police regional sa Bicol an ide-deploy kun saen an formal send-off ceremony an pigkundusir ngunyan na September 11 sa Naga City, komo dugang na pwersa sa 800 officers gikan sa Naga City Police Station.
