Pig-inkaminar kan Department of Social Welfare and Development (DSWD) an mga miyembro kan Pantawid Pamilyang Pilipino Program (4Ps) na magparehistro sa Enhanced Lifeline Program (ELP) kan Maynilad asin Manila Water tangani makakua nin diskuwento sa singil sa tubig.
Sigun ki DSWD spokesperson Irene Dumlao, sakop kan lifeline rate an mga pamilyang hababa an kita na kumokonsumo kan 10 cubic meters pababa kada bulan.
Nilalaoman an paglangkaw nin konsumo sa tubig asin kuryente ngunyan na paparani an holiday season.
Kaipuhan magpahiling nin 4Ps ID, sarong government-issued ID, application form, asin pinakahuring water bill sa arinmang helpdesk o opisina kan Maynilad o Manila Water.
Pwede man na mag-apply an mga non-4Ps households na laog sa poverty threshold basta igwa nin sertipikasyon gikan sa saindang lokal na social welfare office.
