Pigpapakarhay na kan Department of Migrant Workers (DMW) an repatration request kan 223 Overseas Filipino Workers (OFW) sa Israel.
Sigun ki DMW Secretary Hans Leo Cacdac na kaiba na man nindang pinapakarhay an mga kakaipuhanon sa biyahe kan 30 Filipino na iyong magigin primerong batch na mapuli sa nasyon.
An grupo kan 30 an kinababalihan kan 26 OFW na nag abot sa Jordan makalihis an pag agi sa Allenby Bridge asin King Hussein Bridge kan nakalihis na aldaw nin Dominggo.
Sa aldaw man nin Martes, mapuli sa nasyon an 26 na mga OFW na iibahan pa kan tulong Pinoy gikan sa Jordan asin saro gikan sa West Bank.
Pigsierto man ni Cacdac na an mga mapuling OFW an makakaresiber nin bastante na tabang gikan sa gobyerno.
Pag-abot sa nasyon, matatawan sinda nin P150,000 na financial assistance, training vouchers gikan sa Technical Education Skills Development Authority (TESDA), allowances, psychosocial counseling asin post-arrival medical check-ups.
Sa presente, nasa Alert Level 3 an Israel asin Iran huli sa padagos na labanan.
Huli digde, inabisuhan ninda an mga Pinoy sa Israel na ikonsiderar an repatration tangani dae sinda madamay sa kariribokan.
