Ipigkumparar ni Department of National Defense (DND) Secretary Gilberto Teodoro sa ‘body odor’ an mga nagin bwelta kan China sa mga nagin akusasyon kan Armed Forces of the Philippines (AFP) mapadapit sa mga nasabat na iligal na droga sa Zambales na dae soboot malabong kagibuhan ini kan saindang nasyon tanganing rauton an futuro kan mga mamamayang Pilipino.
Sigun sa sekretaryo, kun nadadakop pirmi an China sa saindang mga iligal na aktibidad pirming buga sana an saindang mga nagigin kasimbagan asin mayong naipapahiling na bastanteng ebidensiya tanganing patunayan na mayo sindang kinaaraman sa gibuhong ini.
Dugang pa kan sekretaryo, kun an sarong tawo an igwang masangsang na parong o ‘body odor’ asin ini an nagigin pag-urulayan imbes soboot na magbago asin magkarigos, pigbabasol sana ini sa tawong nakakaparong o nakakaaram.
Dugang pa ni Teodoro, an mga ahensiya asin an gobyerno kan Pilipinas an nagtataram nin igwang kalakip asin kaibahang mga ebidensiya na iyong magpapatotoo asin masuporta sa mga nasambitan ng akusasyon asin pahayag.
Kaya naman abiso kan sekretaryo sa China, kun pigpapahimutikan ninda an mga akusasyon mapadapit sa pagpapalaganap kan iligal na droga sa mga katubigan kan West Philippine Sea, mapahiling asin matao soboot sinda nin bastanteng ebidensiya na masuporta sa saindang mga pahayag asin bako sana puro buga.
Mientrastanto, maruruduman man na pighayag ni Philippine Navy Spokesperson for the West Philippine Sea Rear Admiral Roy Vincent Trinidad sa sarong pulong balitaan sa Villamor Airbase sa Pasay City, na bakong malabo asin makusog an saindang kutob na an mga droga an gikan sa China huli sa mga Chinese markings na nahiling sa mga packaging kan mga droga kun saen nasakote man an sarong chinese-malaysian na foreign national.
