Pig-anunsyar kan Department of Energy (DOE) kaibahan an Department of Social Welfare and Development (DSWD) asin Energy Regulatory Commission (ERC) na saindang pigpaparekas an pag-finalize kan polisiya na matao nin waiver kan kuryente para sa mga kwalipikadong low-income households na nagko-konsumo nin 50 kilowatt-hour o mas hababa kada bulan.
Sigun sa bagong guidelines, piglalaoman na antes mag-Pasko, magkakaigwa nin 100% “Lifeline Rate” discount an mga benepisyaryo kan Pantawid Pamilyang Pilipino Program (4Ps) nin dae na kinakaipuhan pang mag-apply sa mga opisina kan utility.
Huli sa presente, kinakaipuhan pa kan mga 4Ps beneficiaries na magpasiring sa saindang electric cooperatives tanganing mag-apply para sa Lifeline Rate, na nagigin rason kan hababang numero kan mga aplikante huli sa problema sa pamasahe.
Sigun ki Energy Secretary Sharon Garin, obheto kan gobyerno na halion an mga ulang asin gibuhong mas marekas an proseso para sa mga low-income na konsyumer.
Sa irarom pa kan bagong polisiya, magkakaigwa man nin data-sharing agreement an DOE, DSWD, asin mga electric cooperatives tanganing otomatikong ma-verify an mga benepisyaryo kan 4Ps asin makua ninda an Lifeline Rate discount kun an saindang konsumo an dae malangkaw sa 50 kWh kada bulan.
Piglalaoman kan DOE na maisasaley an mga bagong polisiya antes mag-pasko, asin an mga benepisyaryo an makikinabang gikan sa zero-billing system na dae na kaipuhan pang magsumiter nin mga dokumento.
Siring man, nilinaw ni Garin na an mga benepisyaryo na dae nakarehistro sa saindang sadiring pangaran sa elecetric meter an pwede pa man mag-agi sa verification process.
