Kumpiyansa an Department of Energy (DOE) na maaabot kan Pilipinas an target kaining 35% na parte kan renewable energy (RE) sa power generation mix pagsapit kan 2030, sa ibong kan nagkapirang pagkaantala sa mga proyekto asin pagbabago sa polisiya kan Estados Unidos.
Sa forum na “State of Philippine Energy” kan Economic Journalists Association of the Philippines (EJAP), sinaysay ni DOE Undersecretary Mylene Capongcol na matutok an ahensiya sa pagpapautob kan mga nakalinyang proyekto tanganing masierto na matatapos an mga ini sa takdang panahon.
Sigun sa Philippine Energy Plan 2023–2050, target kan nasyon na maabot an 35% RE share sa 2030, 50% sa 2040, asin domination kan RE sa power mix pag-abot kan 2050.
Sa ngunyan, nasa 24% na an RE share.Dae man ikinahadit ni Capongcol an posibleng epekto kan anti-renewable energy stance ni US President Donald Trump, huli ta kadaklan sa mga RE investor an gikan sa Pilipinas, China asin iba pang nasyon sa Asya.
Mientrastanto, sigun ki Energy Regulatory Commission (ERC) Chairperson Francis Juan, iba an kamugtakan kan Pilipinas kumparar sa US pag-abot sa energy resources, asin mas limitado an lokal na mapagkukuanan kan fossil fuel.
Dugang pa digde, sinaysay ni EDC AVP Allan Barcena, na igwang bagong geothermal exploration sinda sa Mindanao asin magin sa Indonesia.
Apwera sa geotherman, pigtututokan man kan DOE an offshore wind energy.
Sigun sa Capongcol, igwang potensiyal an Pilipinas na makakriar nin 178 GW gikan sa offshore wind- mas halangkaw kaysa sa kabilogang installed RE capacity na 7.05 GW. Piglalaoman na makakapag-kriar an offshore wind nin 19-50 GW pag-abot nin 2050.
