Mas pinahigot pa kan Department of Health Bicol an saindang mga programa tanganing an testing asin pagbulong kan human immunodeficiency virus (HIV) an mas magin bukas sa publiko orog na sa bilog na rehiyong Bikol.
Sigun ki DOH-5 program coordinator Samuel Banico, igwa na soboot sinda nin treatment hubs sa gabos na probinsiya sa Bikol asin primary healthcare facility.
Marurumduman, pigpuonan kan Bicol Regional Hospital and Medical Center (BRHMC) an saindang treatment hub kan 2007, pigsundan ini kan Bicol Medical Center (BMC) kan 2017, asin Masbate Provincial kan 2021.
Katakod kaini, an nagkapira pa sa treatment facilities sa Bicol region iyo an Bicol Region General Hospital and Geriatric Medical Center, Camarines Norte Provincial Hospital, Family Planning Organization of the Philippines – Masbate Chapter, Eastern Bicol Medical Center, asin Sorsogon Provincial Hospital.
Dugang pa ni Banico an gabos na probinsiya an igwa na nin confirmatory test na bukas asin libredo para sa publiko.
Obheto kan ahensiya na maggamit nin innovative technologies tanganing maserbisyuhan an mga indibidwal na nabubuhay na igwang HIV asin mapakusog an kolaborasyon sa manlae-laen na organisasyon tanganing mapugulan an pagdakol kaini.
Kan Pebrero, an DOH-Bicol nakapagrehistro nin nasa 3,353 People Living with HIV na kun saen 94 percent o katampad kan 3,153, an lalaki asin 200 an babae.
An nasambitan ng data nagpapahiling na halangkaw an kaso sa mas joven na edad kun saen 54% kan kaso an nag-eedad 25-34 anyos asin an 28% an nag-eedad 15-24-anyos.
Sa ngunyan, apwera sa community-based testing asin treatment accessibility, kaipuhan man an pondo para sa mga programa asin educational campaigns tanganing malikayan an nasambitan ng helang.
