NAGA CITY- Nagpatanid an Department of Health sa publiko dapit sa mga helang na pupwedeng mauso sa paglaog kan La Nina phenomenon sa satuyang nasyon.
Sa sarong pahayag Pig-aapod ini ni Health spokesperson Asec. Albert Domingo komo “WILD” na sarong acronym na may ibig sabihon na Water and Food-borne diseases; Influenza-like illnesses; Leptospirosis; asin Dengue.
Katakod kaini an patanid na an enkaso dae man sigurado sa mga iinumong tubig, pakuluan na sana ini sa laog kan duwang minuto tanganing malikayan na matamaan kan mga water and food-borne diseases.
Kabali man sa mga pigpatanid kan tagapagtaram an mga influenza-like illnesses siring kan abo, sipon, asin sore throat na kawsa naman kan pabago-bagong timpla kan panahon.
Katakod kaini nagpagiromdum man si Asec. Domingo sa publiko na likayan an pagsulong asin pagtampisaw sa mga tubig baha, asin kun dai man malilikayan tulos na magkarigos ning malinig na tubig pag-uli nin harong o tulos na magpakonsulta sa doktor kun igwa nin lugad, ini an huli naman sa banta kan leptospirosis na karaniwang nakukua gikan sa bacteria na naggigikan sa ihi kan mga infected na hayop na nag kumokontamina sa mga tubig baha.
Pigpagirumdoman man an publiko na magsulot nin mga bado na may haralabang mangas asin pantalon o pajama tanganing malikayan man sa kagat kan namok na pupwedeng magpuli sa hilang na dengue.
