NAGA CITY- Sa tahaw kan mga ilegal na gibuhon na igwa nin kinaaraman sa Philippine Offshore Gaming Operators (POGOs), tinawan-duon ni Justice Secretary Jesus Crispin Remulla kan Dominggo, June 9, na pinakikiulayan ninda an mga dayuhan sa nasyon na sunudon an mga ley kan Pilipinas o kun dae, an mahahampang an mga ini sa magagabat na legal na padusa.
Iniluwas ni Remulla an babala makalihis an raid sa POGO hub sa Porac, Pampanga kun saen napag-araman kan mga otoridad an mga ebidensya kan torture asin kidnapping. Piglangkaw na kan Justice Secretary an National Bureau of Investigation (NBI) asin Bureau of Immigration (BI) na mangenot sa kaso, magsunad nin mga kaso kun kinakaipohan, asin tolos na ideport an mga mapapatotoohang nagbalgar sa immigration laws.
Sigun ki Remulla, maogmang pig-aako an mga dayuhan na magtinir sa nasyon asin pupwede nindang tratuhon ini komo saindang sadiring istaran hasta sinda an bilog na puson an nagsusunod sa mga ley nin naaayon asin mayong kondisyon.
Enot nang pigreport na an raid kan nakalihis na Miyerkules an nag-abot sa pag-arestrar kan 158 Chinese, Vietnamese, asin Malaysian nationals. Pigreport man na pinapadalagan an POGO hub kan Lucky South 99 Outsourcing.
Sinaysay kan Presidential Anti-Organized Crime Commission (PAOCC) na piglalaoman nindang makakapag-arestrar pa sinda nin labi sa 1,000 katao.
