NAGA CITY-Pigsisisi kan Department of Justice si Pastor Apollo Quiboloy kun nagin madahas an mga personahes kan Philippine National Police sa pagsusunad nin arrest warrant laban sa pastor sa KOJC compound.
Kun marurumduman nagkaigwa nin kariribukan asin tensyon makalihis na punduhon kan mga miyembro kan Kingdom of Jesus Christ an mga pulis na masunad kudta nin arrest warrant sa siyudad nin Davao.
Sa sarong patara-tara pigsambit ni Justice Undersecretary Raul Vasquez na ginibo sana kan PNP an saindang trabaho na ipautob an ley asin mayo ining intensyon na magkaigwa nin kariribukan.
Sigun sa ahensya, kun nagsuko sana si Quiboloy dai na sana nangyari an nangyari. Enot nang pigduon kan PNP na lehitimo an saindang operasyon sa pagsusunad nin warrant laban sa Pastor.
Nangapudan man an DOJ ki Quiboloy na magsuko na asin hampangon an mga kaso kaini sa korte asin tanganing mai-eksplikar kaini an saiyang lado.
