Pigtawan-duon kan Department of Justice na sinda an patas sa isinasagibong imbestigasyon dapit sa pagkawara kan mga sabungero. Kasunod kan pagkaka-imbwelto kan nagkapirang personalidad siring kan gaming business tycoon na si Charlie ‘Atong’ Ang, pigsierto ni Justice Secretary Jesus Crispin Remulla na patas asin mayong pigpapaboran an saindang pag-iimbestigar.
Mantang kasabay man kaini an saiyang pagsierto na maagi sa ‘due process’ an mga reklamong pigsunad kan mga kaparientes kan nawawarang mga sabungero sa saindang opisina.
Kasuodma, pormal ng nagsunad an mga ini nin reklamong ‘murder’ asin ‘serious illegal detention’ kontra sa mga respondents na si Charlie ‘Atong’ Ang pati an nagkapira pa kaining kairibahan.
Pahayag pa ni Secretary Remulla, na dae madalian an pagproseso sa mga reklamong ipigsunad sa opisina kan Department of Justice.
Maagi soboot ini sa ‘evaluation’ o masusing pagsisiyasat huli man ta igwa pa soboot mga detalyeng kaipuhan na matawan nin kaliwanagan dapit sa reklamo.
Hurot kata kaini na susurion pang marhay man Department of Justice an mga testimonya kan naglantad na mga testigo asin magin an mga ipigheras na pahayag pati kan mga complaints.
Kaya huli kaini, aminado an presenteng sekretaryo kan ahensiya na halabang proseso an pag-aagihan tanganing maresolbaran sana an pagkawara kan mga sabungero.
Alagad maski saiyang pig-ako na ini bakong tulos-tulos saiyang pigpromesa man na sainda ining dae bubutasam hasta sa matapos an nasambitan ng kaso.
Sa presente nahahampang an negosyanteng si Charlie Atong Ang asin kaiba pang iba sa reklamong murder asin serious illegal detention na ipigsunad kan kaparientes kan mga nawawarang sabungero sa Department of Justice.
