NAGA CITY- Narekober man kan Presidential Anti-Organized Crime Commission (PAOCC) an sarong surat gikan sa Office of the President na pirmado ni dating presidential spokesperson Atty. Harry Roque sa paghalughog sa POGO hub sa Porac, Pampanga.
Sigun ki PAOCC USec. Gilbert Cruz, an mga dokumento an may petsang 2021 na nakumpiskar sa laog kan Lucky South 99 compound. Sinaysay man kan opisyal na kaipohan pa nindang iberipika an nasambitan ng mga surat tanganing masierto an authenticity kan mga ini.
Sigun pa sa opisyal, an dokumento na pirmado ni Roque an surat gikan sa saiyang executive assistant na naghahagad kaidto nin travel support sa pagpasiring kaini sa Poland. Nag-apply soboot kaidto si dating executive assistant ni Roque para sa Schengen visa.
Mientrastanto, sinaysay man ni Casio na mayong criminal value an nasambitan ng dokumento sa saindang nagpapadagos na imbestigasyon kontra sa ilegal na POGOs. Sa ibong na lado man, ipinaliwanag ni Atty. Roque na malinaw na mayong kinaaraman an narekober na affidavit of support sa anuman na POGO operation alagad ginamit ini para sa ibang purpose.
Soboot, an mga dokumento an pagsasadiri kan saiyang dating haloy na empleyado na nag-aadal ngunyan sa Clark na posibleng harani sa ni-raid na POGO hub sa Porac, Pampanga.
Mientrastanto, pig-iimbestigaran na man kan PAOCC an mga opisyal asin incorporators kan Lucky South 99 asin kun nagsisirbing abogado kan mga ini si Roque. Dati kayang nagsirbi si Roque komo abogado para sa Whirwind Corporation na sarong real state company na nagpapaupa nin property sa Lucky South 99.
