Pig-iimplementar an apat na aldaw na work week sa ibang mga opisina bilang parte kan flexible work arrangement na sinasabi sa Labor Advisory kan Department of Labor and Employment (DOLE). An target kan nasabing polisiya iyo an pagmukna nin alternatibong work schedule na mas angay sa presenteng kamugtakan kan ekonomiya asin sosyodad.
Sa intrevista kan Bombo Radyo Naga ki Imelda Gatinao, Regional Director – DOLE Bicol, sa lindong kan compressed work schedule, mas mahalaba an work hours kada aldaw sa laog nin apat na aldaw, imbes na sarong aldaw na mayong trabaho. Lininaw kan ahensya na boluntaryong kasunduan ini sa pagultanan kan employer asin empleyado, asin pwedesir na isabay sa work-from-home o hybrid arrangement depende sa polisiya kan kumpanya.
An implementasyon kan flexible work arrangement pighihiling bilang kasimbagan sa padagos na paglangkaw kan presyo kan lana, na nagdadara sa mas halangkaw na pamasahe asin dagdag na gastos sa oro-aldaw na byahe kan mga trabahador. Sa paagi nin mas halipot na work week, piglalaoman na mabawasan an gastos kan mga empleyado asin madudugangan an oras para sa pamilya asin personal na pangangaipo.
Alagad, pigtawan duon kan DOLE na bako ining mandatory regulation. Depende pa man giraray ini sa desisyon kan lambang kumpanya kun baga iimplementar an apat na aldaw na semana nin pagtrabaho, asin bako ining awtomatikong angay para sa gabos na industriya, partikularmente sa mga sektor na nangangaipo nin padagos na operasyon arog kan paggibo asin pag-ataman sa salud.
Sa kabilogan, an apat na aldaw na semana nin pagtrabaho nahihiling bilang sarong makabagong lakdang tanganing maibsan an epekto kan halangkaw na presyo kan lana sa mga trabahador. Alagad, an angat nagdadanay kun pano ini maiimplementar nin epektibo sa manlaen-laen na klase nin negosyo asin industriya, asin kun pano mamantenir an balanse sa pag-ultanan kan produktibo kan kumpanya asin kan karahayan kan mga empleyado.
