Nag-isyu nin mga panundunan an Department of Labor and Employment (DOLE) para sa tamang pasahod sa holidays sa Agosto 21 o Ninoy Aquino Day asin Agosto 25 o National Heroes Day.
Sigun ki Labor Sec. Bienvenido Laguesma, pigdeklarar ni Presidente Ferdinand Marcos Jr. sa bisa kan Proclamation No. 727 an Agosto 21 komo special non working holiday mantang an Agosto 25 man komo regular holiday.
Sa inisyung guidelines kan ahensiya, an mga empleyado sa mga pribadong sektor na malaog sa special non-working holiday sa Agosto 21 an dapat na makaresebir nin dugang na 30% kan saidang aldawang sahod apwera pa sa basic wage para sa enot na walong oras.
Kun overtime man, dapat makaresebir an mga empleyado nin 30% kan saindang orasang sahod. Kun nataon man na rest day, dapat na makaresebir nin dugang na 50% kan 200% holiday rate asin kun overtime pa an, igwang dugang na 30% kan orasang sahod.
Ipapautob man an “no work, no pay” apwera na sana kun igwang polisiya an kompaniya o collective bargaining agreement.
Mientrastanto, para man sa regular holiday sa Agosto 25, dapat na makaresebir nin double pay para sa enot na walong oras asin kun nag-overtime daoat na makaresebir nin dugang na 30% kan orasang sahod.
Kun nataong rest day, asin naglaog an empleyado, dapat na mabayadan nin dugang na 30% kan basic wage apwera pa sa double pay asin kun overtime, igwang dugang na 30% kan orasang sahod.
Makakaresebir pa man nin 100% kan basic wage an mga empleyadong dae malaoag sa regula holiday, basta maglaog sa trabaho sarong aldaw antes an holiday.
