Pigsierto kan Department of Labor and Employment (DOLE) na makikinabang man sa ument sa sahod an mga minimum wage earners sa luwas kan Metro Manila.
Sigun ki Labor Secretary Bienvenido Laguesma, limang Regional Wage and Productivity Boards na an nagpuon kan proseso para sa panibagong wage hike: Region 1 (Ilocos), Region 2 (Cagayan Valley), Region 3 (Central Luzon), Region 4A (Calabarzon), asin Region 7 (Central Visayas).
Dugang pa ni Laguesma, ini an alinsunod sa kasuguan ni Presidente Ferdinand Marcos Jr., na magsagibo nin tulos na review sa regional minimum wage rates sa laog nin 60 aldaw puon sa huring wage order.
Marurumduman na an NCR wage board an enot na nagluwas kan bagong umento ngunyan na taon, aprobado kan naakalihis na Hunyo 30: P50 dugang na sahod kan nasa 1.2 milyong obrero sa rehiyon kun saen epektibo ini puon Hulyo 18.
Sa bagong umento, an daily minimum wage sa NCT an malangkaw puon P645 pasiring P695 para sa non-agriculture sector, asin puon P608 pasiring P658 para sa agriculture, retail, asin service establishments na igwang 15 o mas kadikit na empleyado asin manufacturing firms na igwang mas hababa sa 10 regular workers.
Apwera sa minimum wage earners na pigkakarkulong 5 milyon, sinaysay ni Laguesma na pwedeng makinabang man an pigkakarkulong 8 milyon na obrero na nagsasahod nin labi sa minimum.
Pigtutugotan man na maghagad nin exemption sa umento an sararadit na negosyo na na igwang dae malabi sa 10 empleyado asin mga kumpanyang naapektaran kan kalamid o krisis.
Dae man sakop kan minimum wage law an mga rehistradong Barangay Micro Business Enterprises.
