Pigsugo ni Labor Secretary Bienvenido Laguesma an imbestigasyon sa 98 business process outsourcing (BPO) companies na soboot nagpirit sa saindang mga empleyado na magtrabaho maski delikado an kondisyon huli sa Super Typhoon Uwan (Fung-wong).
Sigun sa BPO Industry Employees Network (BIEN Philippines), dakol na empleyado an pigpirit mag-report on-site sa ibong kan mahewasang pagbaha, delikadong pagbiyahe, asin pagkawara kan kuryente, kun saen an mga dae makakalaog makakareseber nin “notice to explain” (NTE) o pagpirit sa mga ini na maggamit nin leave credits.
Sinaysay pa ni Laguesma na pigsugo kaini an mga regional directors kan DOLE na imbitaran an pamayuhan kan mga kumpanya tanganing ipaliwanag an saindang lado antes magdesisyon sa masunod na lakdang.
Sigun ki BIEN National president Mylene Cabalona, alagad may pirang kumpanya na nagtao nin shuttle service, libreng pagkakan, o paramientras na madadagusan, inapod kaining“token measures” an kasuguan kan mga kompanya na mas pigtatawan importansiya an operasyon kaysa kasalbaduhan kan mga empleyado.
Kadaklan sa mga BPO na iimbestigaran nasa Metro Manila, mantang an nagkapira nasa Bacolod, Cebu, Lipa, Sta. Rosa, Meycauayan, Clark, asin Baguio.
Pig-enkaminar kan BIEN an DOLE na siertuhon na enoton an kasalbaduhan kan empleyado, asin dae padusahan o piriton maggamit nin leave credits an siisay man na dae makalaog sa trabaho huli sa maraot na panahon.
