Dagos-dagos an Department of Labor and Employment (DOLE) sa ginigibong profiling sa mga nagtatrabaho sa Philippine Offshore Gaming Operators (POGO) na mawawaran nin trabaho.
Ini an kasunod kan kasuguan ni Presidente Ferdinand Marcos Jr., na dagusan nang ipagbawal an POGO sa nasyon basado sa saiyang naging pahayag kan nakalihis na State of the Nation Address (SONA).
Sigun ki Labor Secretary Bienvenido Laguesma, target nindang matapos an profiling sa masunod na bulan.
Obheto kan profiling na aramon an trabaho kan mga obrerong nasa Internet Gaming Licensees, ano an lebel kan saindang sweldo asin kun ano an trabahong puwedeng itao sa sainda.
Pigsaysay pa ni Laguesma, dagos-dagos an saindang pagbisita sa mga kompanya hasta sa masunod na bulan orog na ta nakalatag na ngunyan an manlaen-laen na lakdang na saindang gigibuhon sa mga maapektaran na obrero.
Katakod kaini, nakapreparar na man an DOLE na tabangan an mga dayuhang obrero na maaapektaran kan pagsasarado nin mga POGO basta sinda an legal o igwang mga dokumento tanganing makapagtrabaho sa Pilipinas.
