Inanunsyar ni Public Works Secretary Manuel Bonoan kan nakalihis na Sabado na pigbalyo sa ibang pwesto an nagkapirang opisyal kan DPWH sa Region 4B asin man Batangas mantang iniimbestigaran an mga soboot ghost asin maanomalyang flood control projects.
Sa sarong video message, kinumpirmar ni Bonoan an reassignment kan regional director kan Region 4B, mga assistant district engineer, asin man section chiefs kan Batangas 1st District Engineering Office.
Sigun sa opisyal, mawot nindang mapanimbag an dapat man na manimbag, makulong an dapat makulong. Padagos man na bineberipika kan lado kan DPWH an mga flood control project sa Bulacan asin iba pang probinsya sa Regions 3, 4B, 6, 7, asin 8.
Naenot nang nagbilog nin Anti-Corruption Task Force an ahensya asin man sinuspinder an pirang district offices na imbwelto sa mga kwestyonableng proyekto.
Sa tahaw kan pangapudan para sa saiyang pagbubutas, pighurot ni Bonoan na bako ini an tamang solusyon. Aakuon ninda an accountability alagad dae kukunsintihon o tutugutan an ano man na klase nin korupsyon.
Sa isinagibong SONA, pinatanidan ni Presidente Ferdinand Marcos Jr. an mga opisyal na nanghahabon kan pondo para sa flood control projects na sinda an papanimbagon sa ley, makalihis kaining mahiling na nagkapirang substandard asin soboot “guni-guni sana” na proyekto sa saiyang nagin inspeksyon.
