Pigpaparekasan kan Department of Public Works and Highways (DPWH) an pagkonstruhir asin pag-imbentaryo kan mga pendienteng eskwelahan asin classrooms sa bilog na nasyon tanganing magin mas conveniente an pag-adal kan mga estudyante.
Sigun sa DPWH Secretary Vince Dizon, mismong Presidente Bongbong Marcos Jr. an nagtao kan direktiba para magtarabangan an DPWH asin an Department of Education (DepEd).
Ini tanganing mapondohan an mga proyekto asin maparikas an implementasyon siring man an pag-organisar kan pagtogdok nin mga eskwelahan mantang pigbibisto an mga dai pa natatapos na proyekto.
Nanindugan an DPWH na tatawan nin prayoridad an mga pendienteng proyekto bago magdagdag nin mga bagong konstruksyon tanganing maibitaran an mga backlog.
Sa inspeksyon ni Dizon sa Revilla National High School, mawot man kaini na matapos na an tinampo pasiring sa eskwelahan ngani na magin komportable an byahe kan mga estudyante.
Target kan DPWH na matapos an paghirahay kan tinampo antes mag-abot an tag-uran.
