Nakatagama an ₱31 milyon para sa road improvement project sa Mt. Villanueva sa Naga City, na obheto magin mas walkable asin pedestrian-friendly an lugar.
Sa paghampang sa mga Kagawad kan Media ni DPWH Secretary Vince Dizon na an ₱31 milyon an halaga kan kontrata matapos an bidding, hali sa orihinal na kinakarkulong ₱40 milyon.
Kabale sa proyekto an pagpapaluwang kan sidewalk, bike lane asin pagtatanom nin dakol na kahoy.
Mientrastanto, sinabi ni Naga City Mayor Leni Robredo na pigplanuhan an an proyekto kan nakaaging taon. Asin importante ini dahil national highway an Mt. Villanueva pero napapalibutan nin mga dakulang eskwelahan, kaya dakol na estudyante asin pedestrian an naglalakaw digdi.
Apat na lanes an tinampo para sa mga behikulo, kaya limitado an espasyo para sa mga naglalakaw. Kaya Igwa nin posibilidad na magkaskas an mga behikulo.
Sa bagong disenyo, halos mado-doble an sidewalk, asin magkakaigwa nin elevated bike lane na dai basta masasakop kan mga sasakyan.
Babawasan an lapad kan mga lane hali sa dating poco-maso-menos 3.3 meters tanganing magin nasa tolo na metro, kaya dai madaling makapag-bwelo an mga behikulo.
Pigpaliwanag ni Robredo na maski may speed limit, dai gabos na motorista an nagsusunod. Kaya sa bagong disenyo, an mismong tinampo an makakatabang para mapahinay an mga behikulo asin maenkaminar an mga motorista na magsunod sa speed limit.
Pigtawan-doon ni Dizon, dai gabos na Pilipino igwa nin sadiring behikulo. Kaya dapat man taanan importansya an pedestrians, commuters asin cyclists.
Sinabi man ni Dizon na dapat tama an disenyo asin drainage kan mga tinampo, imbes na pirming patchi-patchi, tanganing mas mahaloy an proyekto.
Sa presenteng kontrata, sidewalk, bike lane asin pagtatanom nin mga kahoy an pangenot na sakop kan proyekto.
