NAGA CITY- Arestado an sarong drug personality sa anti-illegal drug operation kan mga otoridad sa laog mismo kan simbahan sa Barangay Palestina, Pili, Camarines Sur.
Binisto an suspek na si Argie Avila, 27-anyos alyas “Sakristan”.
Sa entrevista kan Bombo Radyo Naga ki PC/Insp. Chito Oyardo, Chief of Police (COP) kan Pili-PNP, sinaysay kaini na nadakop ninda si Avila sa hampang mismo kan grotto kan nasambitan ng simbahan sa lugar kunsaen narekober sa suspek an sachet kan pigtutubudang shabu.
Sigon ki Oyardo, nagtatrabaho sa nasambitan ng simbahan si Avila kunkaya dae naririsa na embwelto ini sa mga transaksyon kan iligal na droga sa lugar.
Dagdag pa kaini, haros labi sa sarong bulan na nindang pigbabantayan an kada hiro kan suspek hasta sa magkaigwa nin tyansa na maipasairarom ini sa operasyon.
Sa ngunian, pigpepreparar na an kasong isusunad kontra sa nasambitan ng suspetsado.
